कृति विमोचन / सार्वजनिकीकरण

साहित्य समाचार

मुकारुङको ‘दमिनी भीर’लाई मदन पुरस्कार


५ असोज, काठमाडौं । २०६९ सालको मदन पुरस्कार राजन मुकारुङको उपन्यास ‘दमिनी भीर’लाई प्रदान गरिने भएको छ । मदन पुरस्कार गुठीको शनिबार सम्पन्न साधारण सभाले २०६९ सालको मदन पुरस्कार ‘दमिनी भीर’लाई प्रदान गर्ने निर्णय गरेको हो ।

सिमान्तीकृत नेपाली जनजीवनको जीवन्त चित्रण गरी आख्यान साहित्यमा विशिष्ट योगदान पुर्‍याए वापत दमिनी भीर’ शीर्षकको उपन्याका लागि राजन मुकारुङलाई प्रदान गर्ने निर्णय गरियो’ गूठीद्वारा जारी विज्ञप्तिमा उल्लेख छ ।

दमिनी भीरमा मुकारुङले संक्रमणकालीन नेपाली समाजको बस्तुगत अवस्था, मनोबिज्ञान र व्यवहारलाई नौलो शैलीमा प्रस्तुत गर्नु भएको छ । पुरस्कारको घोषणापछि अनलाइनखबरसँग कुरा गर्दै मुकारुङले आफ्नो कृति पुरस्कृत भएकोमा खुसी व्यक्त गर्नुभयो । उहाँले मदन पुरस्कार आफूले भन्दा पनि दमिनी भीरमा उठाएको मुद्दाले पाएको बताउनु भयो ।
यसअघि उहाँले ‘हेत्छाकुप्पा’ उपन्यास निकै चर्चित भएको थियो । ‘हेत्छाकुप्पा’मा जातीय मुक्ति र नश्ल चेतनाको मुद्दालाई सशक्त रुपमा प्रस्तुत गर्नु भएको थियो । यसअघि २०६८ सालको मदन पुरस्कार अमर न्यौपानेको सेतो धर्ती नामक ग्रन्थलाई प्रदान गरिएको थियो ।

जगदम्बा श्री गीतकार एवं कवि रत्नशम्शेर थापालाई प्रदान गर्ने निर्णय भएको छ । पाँच दशकदेखि नेपाली गीत र कविता लेखनमा निरन्तर नेपाली भाषाको उन्नयन र श्रीवृद्धिमा उल्लेखनीय योगदान गरेवापत् थापालाई सम्मानित गर्न लागिएको गूठीले जनाएको छ । दुबै पुरस्कारको राशी २/२ लाख रुपैयाँ छ ।